大灣區生活多姿多彩，港澳朋友喺中山落腳，有好多嘢值得慢慢了解。無論你係已經喺中山住開嘅老友記，抑或啱啱打算融入呢個城市嘅新朋友，呢個特輯都會幫到你，實用資訊一應俱全，適應中山生活話咁易。今日就同大家講吓：香港長者醫療券喺中山點樣用。

咩係香港長者醫療券

香港長者醫療券係香港政府由2009年開始推行嘅長者醫療資助計劃，專為65歲或以上合資格長者而設，每年派發一筆定額醫療券，用嚟找私營基層醫療服務嘅數。呢個計劃係「人人有份」嘅普惠福利，唔使入息審查，亦都唔需要事先申請，符合資格就自動有。

中山用唔用得？

用得，而且中山仲係試點城市之一。2024年，香港政府推出「長者醫療券大灣區試點計劃」，將醫療券嘅使用範圍由香港擴展到大灣區內地城市，合資格長者喺內地指定醫院睇門診，可以直接用醫療券找數。中山係較早納入試點嘅城市，目前已經有兩間指定醫院開通服務。換句話講，人住喺中山，券照用，唔使再煩「用唔晒、返唔到香港」。

中山有邊兩間醫院？

截至2026年，中山共有兩間醫院納入計劃，兩間都只適用於指定科室嘅門診服務。

陳星海醫院有13個科室：全科、內科、外科、體檢、預防保健、急診、口腔、治未病、康復、推拿、骨傷、婦科、眼科。中山市陳星海醫院門診部。

中山市中醫院有12個科室：內科、外科、骨科、眼科、耳鼻喉科、婦科、中醫、健康管理、心理、睡眠醫學、口腔、急診。中山市中醫院。

用得嘅係指定科室門診服務，包括體檢、中醫、牙科、康復。唔用得嘅包括住院、要預先繳費嘅服務、日間手術、已經被內地醫保報銷嘅費用，純粹買藥或者兌換現金都唔得。記住一句口訣：門診能用、住院不行；醫保已報嘅，唔再疊加用券。

費用點樣結算

內地醫院以人民幣計費，醫療券以港幣結算，中間按香港政府每月公佈一次嘅換算率折算。舉個例：某次服務費用係人民幣200元，當月換算率係1.127，扣券金額就係200×1.127≈225港元，四捨五入到最接近嘅整數。只要戶口餘額夠，可以全額用券找數，亦可以「用券一部分＋現金補差」，但用券金額唔可以超過該次服務嘅實際費用。

掛號就診流程

掛號有三種途徑：一、醫院微信小程式預約，已有醫健通戶口可以直接約；二、門診大堂便民服務中心「長者醫療券收費專窗」現場掛號；三、院內自助機掛號。急診就要去急診分診臺或者自助機掛號，唔行普通門診專窗流程。

身份認證方面，首次嚟醫院必須本人現場辦理。出示香港身份證或者豁免登記證明書，加埋登記回鄉證號碼；確認或者建立醫健通（資助）戶口，未加入醫健通嘅現場同意開通就得；完成認證後，按掛號時段去對應科室候診。完成首次身份認證之後，之後就唔使重複認證，直接掛號就診。辦理地點係門診樓大堂便民服務中心「長者醫療券收費專窗」。

睇診嘅時候，見到醫生要主動講明：本次要用香港長者醫療券結算。另外，建議長者朋友提前24小時透過香港嘅「醫健通」APP申請下載香港電子病歷，就診時出示二維碼畀醫生參考。

結算繳費方面，普通門診返去門診1樓收費處「長者醫療券收費專窗」，急診就去急診科專屬醫療券收費窗口。醫院會向香港政府申報扣減醫療券額度，長者朋友可以喺醫健通APP查看扣減記錄。